Lions gefur heilsugæslunni góðar gjafir

24. mar. 2020

Lionsklúbbur Hornafjarðar og Lionsklúbburinn Kolgríma færðu heilsugæslunni góðar gjafir eða eyrnaþrýstings- og augnþrýstingsmæla ásamt tvo hjólastóla.

Eins og fram kom í Eystrahorni þ. 13. mars þá færðu Lionsklúbbur Hornafjarðar og Lionsklúbburinn Kolgríma heilsugæslunni góðar gjafir eða eyrnaþrýstings- og augnþrýstingsmæla ásamt tvo hjólastóla á dögunum.

“Við erum þakklát Lions fyrir þeirra gjafir í gegnum tíðina og ekki síður þakklát fyrir nýjustu viðbótina, en það var eyrnaþrýstimælir og augnþrýstimælir og tveir hjólastólar sem nýtast bæði á heilsugæslunni og á Skjólgarði. 

Eyrnaþrýstimælirinn mælir hvort hljóðhimnan hreyfist. Hjá börnum er algengt að þau heyri illa vegna vökva í eyrum í kjölfar eyrnabólgu. Þegar þau eru undir 2ja ára, er hætt við að þau verði eftir á í málþroska, ef þau heyra illa réttan framburð á orðunum. Einnig má nota þennan mæli til að meta virkni af eyrnabólgumeðferð. Hægt er að mæla nýfædda sem og fólk á öllum aldri. 

Augnþrýstimælir er ekki staðal búnaður á heilsugæslum almennt, þar sem oftast er styttra í sérhæfða aðstoð en hjá okkur. Þetta tæki mælir þrýsting í fremsta hólfi augans. Háþrýstingur í auga, oftast nefnt gláka, er algengt vandamál hjá fólki frá miðjum aldri og uppúr. Flestir með gláku eru í reglulegu eftirliti hjá augnlækni og þurfa að vera það áfram. En það sem við getum gert núna, er að meta hvort það sé skyndileg versnun á gláku, hvort fólk sé með bráða-gláku eða hvort augnþrýstingur er hækkaður eftir áverka á auga. Þar sem heilsugæslan er einnig bráðamóttaka fyrir suðausturland, teljum við mikilvægt að við getum metið, greint og meðhöndlað bráða augn-vandamál eins og önnur vandamál".

Starfsfólk heilsugæslunnar þakkar fyrir sig.